Annonse

Australia-trenaren har funne veikskapen til Hareide

Australia og Bert van Marwijk treng poeng mot Danmark for å ta seg vidare i fotball-VM. Landslagssjefen trur han har oppskrifta på siger i kampen torsdag.

Australiarane starta VM med 1-2-tap mot Frankrike i ein kamp der «Socceroos» hang overraskande bra med. Van Marwijk var godt nøgd med prestasjonen, men etterlyser fleire sjansar - og ikkje minst mål - i møtet med danskane.

- Vi skal levera ein liknande prestasjon, men vi skal betra dei tinga som utgjer ein forskjell. Vi må skapa fleire sjansar. Og vi såg at Peru fekk mange sjansar mot Danmark. Det blir viktig.

Det eine målet til Australia mot Frankrike kom på straffespark etter ein hands.

Analyse

Før kampen torsdag har den nederlandske landslagssjefen til Australia gjennomanalysert dei svake punkta til Danmark. Det fortel venstrebacken Aziz Behich.

- Vi spelte verkeleg godt mot Frankrike, men vi klarte ikkje å skapa dei store sjansane. Det har vi jobba med. Vi har analysert kva vi var gode og dårlege på, og i tillegg har trenarane analysert Danmark godt.

- Vi veit kor vi kan opne dei opp, og kor vi kan spela oss fri. Så kan vi forhåpentlegvis få ballen i nettet, seier Behich.

Store og sterke

Australiarane ser samtidig mange styrkar i det danske mannskapet til Åge Hareide, og det er liten tvil om at respekten for danskane er stor.

- Danmark har eit sterkt lag og er nummer 12 på Fifa-rankinga. Det seier alt, seier van Marwijk.

- Dei danske spelarane er store og fysisk sterke, så det er eit våpen for dei. Dei franske spelarane har meir kvalitet og er meir kreative, men Danmark er kan henda eit lag i større grad, held han fram.

Taus om Eriksen

Van Marwijk fortel ope at Australia særleg må passa på når Danmark får dødballar. Når han blir spurd om kva dei vil gjera for å stoppa stjernespelaren Christian Eriksen, blir han straks meir løyndomsfull.

- De kan spørja meg 100 gonger. Eg kjenner han frå nederlandsk fotball, og eg har sett han mange gonger for Tottenham. Eg kjenner han, lyder svaret.

Danmark slo Peru 1-0 i VM-opninga og vil så å seia vera klar for åttedelsfinalen med siger over Australia.

(©NPK)

Australia-trenar Bert van Marwijk er godt førebudd før VM-møtet med Danmark. Foto: Pavel Golovkin / AP / NTB scanpix

Annonse