Benjamin Stokke går frå Kristiansund til Randers
Spissen Benjamin Stokke er klar for danske Randers. Han forlèt Kristiansund etter halvtanna år i klubben.
- Benjamin var ein viktig bidragsytar til at vi oppnådde ein svært god plassering i vår første sesong på toppnivå. I år har dessverre vårsesongen hans vore prega av skaden han fekk i første seriekamp, skriv KBK i ei pressemelding.
Kristiansund ville forlenge kontrakten med angriparen, men det har spelaren sjølv ikkje ønskt. Kontrakt gjekk ut etter sesongen. Fleire klubber har vist interesse for spelaren.
- Den siste veka har han uttrykkeleg sagt at han ønsker å forlate KBK for å prøve seg i ein av desse klubbene. Vi har derfor dei siste dagane forhandla med Randers om ein overgang, og kom til semje seint onsdag kveld, heiter det i meldinga frå KBK.
27 år gamle Stokke står med eitt mål på 12 kampar i Eliteserien denne sesongen. KBK ligg på åttandeplass etter 16 serieomgangar.
(©NPK)
Benjamin Stokke skal til dansk fotball.
Foto: Anders Tøsse / NTB scanpix