Bondevik gir seg som leiar for Oslosenteret

Kjell Magne Bondevik (70) sluttar som leiar for Oslosenteret, men fortset som arbeidande styreleiar på deltid.

Samtidig inngår senteret partnarskap med Bjørknes Høyskole, men fortset som eiga stifting, skriv Vårt Land.

Tidlegare statsminister Kjell Magne Bondevik har leidd Oslosenteret sidan han etablerte det saman med KrF-partifellen Einar Steensnæs for tolv år sidan. Steensnæs er direktør for senteret, men gir seg 1. oktober, skriv avisa.Oslosenteret har i dag ni tilsette, går det fram av nettsida til senteret.

- Eg har framleis mykje energi og synest det eg driv med er så interessant og givande at eg gjerne vil fortsette vidare. Men frå no blir det som arbeidande styreleiar i 60 prosent stilling ved Oslosenteret, seier Bondevik.

Oslosenteret skal ifølgje avisa også flytte frå Oslo sentrum til lokala til Bjørknes Høyskole på Lovisenberg litt utanfor sentrum.

(©NPK)

Kjell Magne Bondevik gir seg som leiar for Oslosenteret, som han sjølv har etablert. Foto: Audun Braastad / NTB scanpix