Cubansk pressepolitikk blir meir liberal

Cubas presse har lenge vore under streng sensur, og har i praksis fungert som eit talerøyr for styresmaktene.

Cubanske styresmakter har ennå ikkje sagt noko offentleg om ein ny mediepolitikk. Men mykje tyder på at president Miguel Díaz-Canel løyser på den strenge pressesensuren, som det tidlegare Castro-regimet på den karibiske øya innførte.

Uavhengig presse på Cuba er no i ein gråsone, der dei verken er lovlege, eller ulovlege, men dei blir tolererte så lenge dei ikkje skriv om kontroversielle tema.

«Ny kommunikasjonspolitikk »

Cubanske journalistar fortel at politbyrået i kommunistpartiet, eitt av landets mektigaste organ, nyleg godkjente ein politikk som skal bidra til at statskontrollerte medium fungerer på same måte som i andre land.

- Cuba har forandra seg i form av fleire moglegheiter og auka tilgang til informasjon, seier David Vasquez, redaktør for Cachivache, eit moderne nettmagasin i Cuba.

- Befolkninga har kanskje ikkje så mykje tilgang til informasjon som dei ønsker, men det finst ein nyheitsstraum og eit nyheitskonsum i befolkninga. Cuba er ikkje lenger ei mørk hole utan lys, forklarer han vidare.

- Denne politikken kjem etter sterke skuldingar frå statleg media og samfunnet generelt, som ønsker auka tilgang til informasjon. Styresmaktene og partiet ser at openheit blir meir nødvendig, no som internettilgangen i landet har auka, seier Jose Raul Gallego, skribent for den uavhengige nettstaden El Toque.

Lågaste internettbruk

Sjølv om tilgangen til internett har auka markant, er internettbruken på Cuba av dei lågaste i verda.

Det er no over 2.500 plassar med internett-tilgang på øya, sjølv om det kostar nesten ei gjennomsnittleg dagsløn for å vere på internett i éin time, strøymer ungdommen til parkane der det er mogleg å kople seg på nett.

Ungdommen nyttar sosiale medium, slik som Facebook, for å lese nyheitsmedium som er blokkerte av staten.

- Informasjonsmonopolet på Cuba blir utfordra, seier Elaine Diaz, grunnleggjaren av den uavhengige nyheitsstaden Periodismo dei Barrio.

(©NPK)

Vil pressa på Cuba bli fri og uavhengig med president Miguel Díaz-Canel? Journalistar meiner at landet beveger seg i riktig retning. Foto: Desmond Boylan / AP / NTB scanpix