EU til Ryanair: Dette er ikkje ein jungel

Administrerande direktør Michael O'Leary i Ryanair var onsdag i eit møte med arbeidskommissær Marianne Thyssen i EU i Brussel for å diskutere konfliktane med flygarar og kabintilsette som har ramma det irske flyselskapet dei siste vekene.

På møtet fekk O'Leary ei kraftig irettesetjing av Thyssen.

- Eg er ikkje mot Ryanair eller mot forretningsmodellen til lågprisselskapa. Men med stor suksess følgjer stort ansvar. Den indre marknaden er ikkje ein jungel. Det har klare regler, seier Thyssen i ei pressemelding.

Tilsette skal sleppe å måtte forhandle om respekt for EUs lover og regler, understrekar EU-kommissæren.

- Dette er heller ikkje noko som kan gjerast forskjellig frå land til land. Dette gjorde eg veldig klart for O'Leary i dag, seier ho.

Ryanair er for tida i konflikt med personell i fleire land, deriblant norske kabintilsette i Alicante. Tilsette i seks land har varsla streik frå fredag, noko som kan føre til kansellering av ei stor mengd flygingar.

O'Leary opplyser at han no har lagt fram eit nytt tilbod til flygarane og dei kabintilsette.

Men han ber også EU-kommisjonen om å gripe inn mot tilsette i konkurrerande flyselskap, som O'Leary meiner har blanda seg inn i konflikten på ein uakseptabel måte.

(©NPK)

Eit Ryanair-fly på flyplassen i Weeze i Tyskland. Foto: Martin Meissner / AP / NTB scanpix