Ferjebrann var motorhavari

Det er den førebelse konklusjonen etter at Sjøfartsdirektoratet starta undersøkingane sine, skriv Fjord1 i ei pressemelding tysdag ettermiddag. I alt 49 passasjerar vart evakuerte til båtar i området, og ferja sende ut mayday-melding på grunn av det som såg ut til å vere ein brann i Lysefjorden i Rogaland ved 20-tida fredag kveld.

Éin av mannskapet på fem måtte til helsekontroll etter at han hadde pusta inn røyk.

I ettertid seier driftsdirektør André Høyset at han er glad evakueringa gjekk fint.

- Førebelse funn viser at skadeomfanget er avgrensa. I samarbeid med leverandørane våre kjem Fjord1 til å bruke tida framover til konkludere rundt årsaka til hendinga, seier Høyset.

Eid er eigd av Fjord1, vart bygd i 1978, er 65 meter lang og har ein kapasitet på 146 personar og 50 personbilar.

(©NPK)

49 passasjerar vart evakuerte på grunn av det som såg ut til å vere ein brann i ferja Eid (t.h.) i Lysefjorden i Rogaland. Det er ikkje meldt om personskadar. Ferja Finnøy (t.v.) kom til unnsetning.
Foto: Rebekka Hagen Andreassen / NTB scanpix