FN: Partane i Jemen tar opp att forhandlingane

FNs spesialutsending til Jemen, Martin Griffiths, opplyser at han dei kommande vekene vil få partane tilbake til forhandlingsbordet.

Griffiths har hatt samtaler med president Abed Rabbo Mansour Hadi i Jemen, og med forhandlingsleiar for Houthi-opprørarane, Mohammed Abdul-Salam.

Nye samtaler med houthiane skjer dei kommande dagane, opplyser Griffiths, som håpar at FNs tryggingsråd vil komme opp med ein fredsplan for Jemen alt neste veke.

Hadi blei styrta av Houthi-opprørarane hausten 2014 og har sidan stort sett levd i eksil i Saudi-Arabia.

Saudi-Arabia gjekk til krig mot opprørarane i nabolandet i mars 2015, i spissen for ein regional allianse der blant andre Dei sameinte arabiske emirat deltar med bakkestyrkar.

Over 10.000 menneske er sidan drepne og over 50.000 såra, dei fleste av dei i saudiarabiske flyangrep. Over 3 millionar menneske er drivne på flukt, og 22 millionar menneske i Jemen er nå avhengige av humanitærhjelp.

80 prosent av all nødhjelp blir frakta inn via den Houthi-kontrollerte hamnebyen Hodeida, som dei siste vekene har vore under kraftige angrep frå den saudileidde koalisjonen.

(©NPK)

Over 10.000 menneske er drepne sidan Saudi-Arabia gjekk til krig mot Houthi-opprørarane i Jemen våren 2015, i spissen for ein regional allianse. Dette bilete frå februar i år viser følgjene av eit saudileidd flyangrep i hovudstaden Sana. Foto: AP / NTB scanpix