Fristen nærmar seg for Canal Digital og TV 2

Kommunikasjonsdirektør Tormod Sandstø i Canal Digital opplyser til NTB at dersom partane ikkje blir samde om ein ny avtale innan 1. juni, kan konsekvensen vere at kanalane til TV 2 ikkje vil vere tilgjengelege for kundane til Canal Digital.

Det blir forhandla om kor stor del av programinnhaldet til TV 2 Telenor-eigde Canal Digital skal ha rett til å vise på fjernsyn og i strøymetenestene sine, og kva Canal Digital skal betale for å ha TV 2 i kanalpakkane sine. Eit brot mellom partane kan ramme nær ein million husstandar.

I ei melding som blei lagt ut på intranettet til TV 2 for eit par veker sidan, skreiv sjefredaktør og administrerande direktør i TV 2 Olav T. Sandnes at ei konflikt kan bli utfallet.

- Vi skal gjere alt i vår makt for å finne gode løysingar med Telenor heilt fram til fristen, heiter det i meldinga som Kampanje fekk tilgang til.

Det er parabol- og kabel-TV-kundane til Canal Digital som risikerer svarte TV 2-skjermar knappe to veker før fotball-VM byrjar, eit arrangement TV 2 har rettane til å vise saman med NRK.

Ifølgje VG krev fjernsynskanalen ein stad mellom 216 og 288 millionar kroner meir i året enn dei gjer no. Kanalen meiner kravet vil føre til at Canal Digital betaler nærmare marknadspris for distribusjonen.

Etter det avisa kjenner til, blir det òg forhandla om distribusjon av straume-TV.

- TV 2 har også opna opp for at du mellombels kan sjå TV 2-kanalane kostnadsfritt i strøymetenesta deira dersom vi ikkje kjem til semje. Meir detaljar må vi eventuelt komme tilbake til dersom det skulle bli aktuelt. No jobbar vi på spreng for å lande ein avtale med TV 2 innan fristen, skriv Canal Digital i ein e-post som blei sendt ut til kundane natt til torsdag.

(©NPK)

Illustrasjonsfoto: Erlend Aas / NTB scanpix