Haugesund-keeper trekkjer seg frå U21-landslaget

Opphavleg var Bråtveit ein del av den norske U21-troppen til EM-kvalifiseringskampen mot Aserbajdsjan tysdag, men han blei ikkje med laget til Baku.

Norges Fotballforbund har berre gått ut med at FKH-keeperen har meldt forfall. Sjølv stadfestar Bråtveit til Haugesunds Avis at han har gjort sitt som U21-spelar. Han har måtta sjå Odds sisteskanse Sondre Rossbach vera det føretrekte valet for Noreg mellom stengene.

- Det er enkelt og greitt. Eg er lei av å vera nummer to når eg føler at eg har prestert bra nok til å spela, seier Bråtveit til avisa.

22-åringen fortel at han har vurdert situasjonen lenge. Totalt står han med ni U21-landskampar.

- Eg har vore usikker på eit par samlingar. Og no når det flyt godt her heime, såg eg ingen grunn til å reisa på samling berre for å sitja på benken. Det syg energi, og eg føler at eg kjem tilbake som ein litt dårlegare keeper enn då eg reiste, seier Bråtveit.

Keeperen legg til at han ikkje trur avgjerda vil øydeleggja sjansane hans for ein framtidig karriere på A-landslaget, men han føler seg ferdig som U21-landslagsspelar.

(©NPK)

Per Kristian Bråtveit i aksjon for Noregs U21-landslag mot Irland i november i fjor. Haugesund-keeperen er misnøgd med manglande speletid og gjer seg utilgjengeleg for framtidige landskampar på U21-nivå. Foto: Lise Åserud / NTB scanpix