Hestad-hat-trick då Molde gjekk vidare i europaligakvalifiseringa

Glenavon-manager Gary Hamilton meinte det ville bli «mission impossible» å forsvare 2-1-leiinga frå første kamp.

Hestad var den einaste målscoraren for Molde i bortekampen, og han gjorde mesteparten av jobben framfor mål også torsdag, med 2-0-målet i det 34. minutt, 3-0-målet i det 59. minutt og det forløysande 4-1-målet i siste ordinære minutt.

Dermed blei det Molde-jubel sjølv om storscorar Erling Braut Håland var opptatt med å hjelpe G19-landslaget til tre poeng i EM-sluttspelet i Finland.

Etzaz Hussain sende Molde i leiing på straffespark etter ein snau halvtime, og allereie då var Molde framfor på bortemålsregelen. Då Hestad auka to gonger såg alt ut til å gå på skjener mot neste runde, men Vegard Forrens sjølvmål i det 62. minutt skapte ny spenning.

Med 3-1 trong Glenavon berre ei redusering for å ta leiinga på bortemålsregelen, men det tredje målet til Hestad roa Molde-nervane. På overtid sette Babacar Sarr punktum.

Med Molde-sigeren blir det tur til Albania i neste runde. Lac vann 1-0 heime over Anorthosis Famagusta og gjekk vidare på bortemålsregelen etter 2-2 samanlagt.

Myrto Uzunis scoring i det 88. minutt gjorde at Molde-spelarane må booke reise til Albania i staden for Kypros.

(©NPK)

Eirik Hestad jublar for eitt av dei tre måla sine då Molde tok seg vidare i europaligakvalifiseringa med 5-1 over nord-irske Glenavon. Foto: Svein Ove Ekornesvåg / NTB scanpix