Irans riksadvokat likte ikkje at kvinner fekk sjå fotball

Riksadvokat Mohammad Jafar Montazeri seier at det vil «medføre synd» å sleppe kvinner inn på ein fotballarena igjen.

- Eg fekk med meg at kvinner var til stades på Azadi stadion i går (tysdag). Vi er ein muslimsk stat, vi er muslimar, seier Montazeri, ifølgje det iranske nyheitsbyrået Mehr.

- Vi skal ta oss av alle tenestemenn som tillèt å ha kvinner til stades på stadion under kva omstende som helst. Når ei kvinne går til eit stadion for å sjå halvnakne menn i sportsklede, så vil dette kunne føre til synd, fortset han.

Kvinner i Iran er blitt nekta tilgjenge til fotballkampar sidan den islamske revolusjonen i 1979. Dei muslimske leiarane i landet vil verne kvinnene frå å vere til stades i ein mannleg atmosfære. Dessutan er dei uroa over samanblandinga av kvinner og menn før og etter kampane.

Det er likevel varsla at fotballarrangørane i Iran vil tillate kvinner på ein av returkampane i semifinalen i den asiatiske meisterligaen 23. november. Montazeri åtvarar dei om at han ikkje vil tillate det.

- Om dette gjentar seg, vil eg be påtalemakta i Teheran å reagere, seier han.

(©NPK)

Ei gruppe kvinnelege supporterar heiar på Iran mot Bolivia under landskampen i Teheran tysdag. Foto: Vahid Salemi / AP / NTB scanpix