Annonse

Isbjørnen ved Isfjord Radio på Svalbard har forsvunne

Isbjørnen som tok seg inn på matlageret til hotellet Isfjord Radio på Svalbard, er borte, opplyser Sysselmannen på Svalbard.

Etter at isbjørnen returnerte søndag kveld, vart det vurdert å fjerne han. No har isbjørnen forsvunne, opplyser Sysselmannen på Svalbard i ei pressemelding etter å ha undersøkt området med helikopter måndag ettermiddag.

- Vi observerte ei binne med to ungar eit stykke lenger sør for stasjonen, men ikkje hannbjørnen som har opphalde seg i nærleiken av stasjonen det siste døgnet. Det er ikkje uvanleg at det er isbjørn i dette området, opplyser fungerande sysselmannsoverbetjent Vidar Arnesen.

Det heile starta då isbjørnen braut seg inn på matlageret til hotellet søndag morgon og åt ein pose med sjokolade. Isbjørnen vart skremd då eit helikopter kom. Den kraup ut av eit lite vindauge, hoppa ut av bygninga og la på sprang. Ingen kom til skade under isbjørnbesøket.

Sysselmannen opplyser at dei har kontinuerleg kontakt med dei som jobbar på Isfjord Radio, og at dei vil rykke ut om det trengst. Folk på Svalbard blir bedt om å vere forsiktige.

- Heile Svalbard er isbjørnland, og alle som oppheld seg her, må følgje med og ta sine forholdsreglar, seier Arnesen.

(©NPK)

Isbjørnen tittar ut av eit vindauge etter at den braut seg inn i ein lagerbygning som høyrer til hotellet Isfjord Radio på Svalbard. Foto: Hilde Kristin Røsvik / Svalbardposten / NTB scanpix

Annonse