Kicker: Haaland mistar truleg Sørloth-duellen
Der er lite sannsynleg at Erling Braut Haaland speler den viktige heimekampen for Borussia Dortmund mot RB Leipzig laurdag, skriv Kicker.
Storskåraren frå Jæren var ikkje å sjå under den siste treningsøkta til Dortmund. Kicker meiner det er eit klart teikn på at Haaland ikkje blir med i toppoppgjeret mot laget til Alexander Sørloth i Bundesligaen i helga.
– Det er svært lite truleg at han blir brukt laurdag, skriv det velrenommerte sportsmagasinet.
Torsdag var Borussia Dortmund-trenar Edin Terzic optimistisk då han svarte på spørsmål om Haaland.
– Vi reknar med at alt er bra, at han er smertefri og er tilgjengeleg laurdag, sa han.
Ein lårskade har sett 20-åringen tilbake den siste tida. Han mista nyleg storsigeren til Dortmund i semifinalen mot Holstein Kiel i den tyske cupen.
Haaland står med 25 seriemål denne sesongen. Dortmund har vunne tre av dei fire siste Bundesliga-kampane sine og er eitt poeng bak fjerdeplassen, som gir den siste tyske inngangsbilletten til Champions League neste sesong.
RB Leipzig styrer mot ein trygg andreplass på tabellen.
(©NPK)
Erling Braut Haaland kontrollerer ballen i ein seriekamp mot Union Berlin nyleg. Foto: Martin Meissner / AP / NTB