«Kupper'n» fekk Kongens Fortjenstmedalje

Skøytelegenda Knut «Kupper'n» Johannesen (84) fekk tysdag Kongens Fortjenstmedalje i gull under ein seremoni i Oslo rådhus.

Med styrken sin på dei lengste distansane vann han to OL-gull i tillegg til to sølv og ein bronse i vintervekene i 1956, 1960 og 1964, og han hevda seg også i allroundmeisterskapa med to VM-gull og to EM-gull som høgdepunkt.

Han slo gjennom som 21-åring i 1955 og vann det året den første NM-tittelen sin og den første kongepokalen. Med eitt unntak vann han alle dei norske allroundmeisterskapa fram til 1963. Det var han som stod bak den udødelege sigersresepten "to indre og vekk me'n".

Det første OL-gullet sitt vann han på 10.000 meter i Squaw Valley i 1960 med verdsrekordtida 15.46,6, ei forbetring av rekorden til Hjalmar "Hjallis" Andersen på heile 46 sekund. Fire år seinare blei «Kupper'n» olympisk meister også på 5000 meter i Innsbruck.

Mannen bak utsegna «sølv er nederlag» fekk OL-sølv på 10.000 meter i 1956 og på 5000 meter i 1960, i tillegg til bronse på 10.000 meter i 1964. I åra 1957 og 1964 blei han verdsmeister i allround.

Knut Johannesen har hausta godt med æresprisar også. Han fekk Morgenbladets gullmedalje i 1957, Oscarstatuetten i 1959, Fearnleys olympiske ærespris og sportsjournalistens statuett i 1960.

I 1964 blei Johannesen ein klar vinnar i ei avstemming for å kåra den største idrettsutøvaren nokosinne, og han fekk saman med «Hjallis» Årets heiderspris under Idrettsgallaen i 2013. Det står ein statue av han utanfor Bislett stadion.

(©NPK)

Oslo-ordførar Marianne Borgen stod for utdelinga då skøytelegenda Knut «Kupper'n» Johannessen fekk Kongens Fortjenstmedalje i gull tysdag. Foto: Ole Berg-Rusten / NTB scanpix

Skøytelegenda Knut «Kupper'n» Johannesen med Kongens Fortjenstmedalje i gull, som han tok imot tysdag. Foto: Ole Berg-Rusten / NTB scanpix

Knut «Kupper'n» Johannesen tok imot Kongens Fortjenstmedalje i gull under eit arrangement i Oslo rådhus tysdag. Han blei heidra med musikk av Kampen Janitsjar, som han fekk æra av å dirigera. Foto: Ole Berg-Rusten / NTB scanpix