Annonse

Macron-medarbeidar blir etterforska for korrupsjon

Franske styresmakter har sett i gang korrupsjonsetterforsking av Alexis Kohler, stabssjefen til president Emmanuel Macron.

Etterforskinga vil dreie seg om perioden frå 2012 til 2016, då Kohler (45) hadde ei høg stilling i det franske finansdepartementet.

Fransk påtalemakt opplyser at dei vil undersøkje om Kohler følgde reglar som skal forhindre interessekonfliktar. Potensielle interessekonfliktar kan ha oppstått i tilknyting til den italienske shipping-giganten MSC.

Kohlers mor er kusina til milliardæren Rafaela Aponte, som grunnla MSC saman med ektemannen Gianlugi i 1970. Selskapet er i dag eitt av dei største i verda innan konteinarfrakt og cruise.

I ei fråsegn frå Macrons kontor heiter det at skuldingane mot Kohler er fullstendig grunnlause. Samtidig blir det understreka at han vil samarbeide med etterforskarane.

Kohlers forbindelsar til Aponte-familien vart først omtalt av nettmagasinet Mediapart, som spesialiserer seg på gravejournalistikk.

(©NPK)

Alexis Kohler, stabssjefen til president Emmanuel Macron, er under gransking for skuldingar om korrupsjon. Foto: AP / NTB scanpix

Annonse