Messi avgjer landslagsframtida etter VM

- Det kjem an på kor langt vi kjem, seier Messi i eit intervju med den spanske avisa Sport.

Han seier at tre finaletap på rad i store turneringar har ført til eit anstrengt forhold til pressa.

- Spesielt argentinske medium, fordi vi har ulikt syn på kva det vil seie å ha tatt seg til tre strake finalar.

Argentinarane tapte 0-1 i VM-finalen mot Tyskland i 2014 etter ekstraomgangar. I tillegg gjekk dei på to strake finaletap i Copa America mot Chile i 2015 og 2016.

Messi, som blir 31 år under VM, held Spania, Brasil, Tyskland, Frankrike og Belgia som dei største favorittane til å vinne meisterskapen.

- Det er mange lag som kjem med masse sjølvtillit, både som lag og som enkeltspelarar, seier Barcelona-stjerna.

Messi og det argentinske landslaget spelar sin første VM-kamp mot Island laurdag. I tillegg møter dei Kroatia og Nigeria i gruppespelet.

(©NPK)

Argentinas Lionel Messi seier framtida hans på landslaget er avhengig av korleis det går i VM. Foto: Ivan Sekretarev / AP / NTB Scanpix