Messi trur Barcelona blir den einaste klubben hans i Europa

Lionel Messi (30) seier han blir meir og meir sikker på at han aldri vil spele for ein annan europeisk klubb enn Barcelona.

Messi har spelt heile si vaksne karriere for Barcelona. Argentinaren, som har scora vanvitige 552 mål, har vore linka til Pep Guardiola og Manchester City.

I eit intervju med TV-stasjonane El Trece seier 30-åringen at han ønsker å runde av karrieren i sitt eige heimland.

- Eg har alltid sagt at eg ein dag ønsker å spele i Argentina. Eg veit ikkje når det vil skje, men det må bli i Newell's Old Boys, ingen andre stadar, skriv BBC som siterer TV-stasjonen.

- Eg blir meir og meir sikker på at Barcelona blir min einaste klubb i Europa, seier Messi.

Superstjerna signerte for Barcelona i 2001 og har kontrakt med den spanske klubben ut 2021-sesongen. I desse dagar er han med på Argentinas førebuingar før VM i Russland til sommaren.

Argentina er i gruppe med Island, Kroatia og Nigeria.

(©NPK)

Barcelona-spelar Lionel Messi trur ikkje han vil spele for andre europeiske klubbar. Foto: AP Photo/Natacha Pisarenko/NTB scanpix.