Nils Erik Ulset er tildelt Egebergs Ærespris

Paralympicsutøvaren Nils Erik Ulset (34) frå Tingvoll fekk tildelt Egebergs Ærespris under leiarmøtet i Norges idrettsforbund på Gardermoen fredag.

Kammerherre Egebergs Ærespris er rekna som det høgste heidersteiknet i norsk idrett og blir gitt til utøvarar som har markert seg i to eller fleire idrettar. Ulseth har utmerkt seg i både langrenn og skiskyting.

34-åringen har konkurrert på øvste nivå sidan Paralympics i Salt Lake City i 2002. Han har 16 år på rad tatt medaljar i alle store meisterskap han har deltatt i - noko som gjer at han kan vise til totalt 30 medaljar i Paralympics og VM.

Under Paralympics i Pyeongchang vann han bronse på 15 kilometer individuell skiskyting og sølv i open stafett.

- Denne prisen betyr utruleg mykje for meg. Ganske tidleg i idrettskarrieren min skjønte eg at det berre var dei aller største utøvarane som får denne prisen. Det krev utruleg mykje. Derfor er eg utruleg stolt, audmjuk og takknemleg.

- Eg vil takke både Norges Skiskytterforbund, Norges Skiforbund, Olympiatoppen og ikkje minst Norges idrettsforbund for den jobben dei gjer, sa prisvinnaren i takketalen.

(©NPK)

Nils Erik Ulset fekk fredag tildelt Egebergs Ærespris. Foto: Geir Olsen / NTB scanpix