Norsk Hydro-tilsett sakna i Rio de Janeiro

Mannen har vore tilsett i selskapet sidan byrjinga av 80-talet, og har vore utstasjonert i Brasil sidan nyttår. Hydro opplyser til VG at han har vore sakna sidan fredag kveld.

- Vi har mobilisert ressursane vi sit på som selskap, og tilsette og venner i Rio de Janeiro jobbar no med å dele ut flygeblad med bilde av mannen. Det viktigaste no er at vi finn kollegaen vår og støttar familien hans gjennom denne vanskelege tida, seier informasjonssjef i Norsk Hydro Øyvind Breivik.

Ifølgje Breivik vart norsk politi varsla om saka måndag. Også utanriksdepartementet er kjent med saka.

- Vi er kjent med at ein norsk statsborgar er sakna i Rio de Janeiro, og vi er i dialog med arbeidsgjevar og hjelper til i saka, seier pressetalsperson Ane Haavarsdatter Lunde i UD til NTB.

(©NPK)

Mannen er tilsett i Norsk Hydro og utstasjonert i Brasil. Illustrasjonsfoto: Vidar Ruud / NTB scanpix