Norske bistandsaktørar utsett for grov svindel i Aust-Afrika

Nærmare 5 millionar kroner er underslått eller på annan måte misleghalde, skriv Bistandsaktuelt. Saka er den største misleghaldssaka relatert til norsk sivilsamfunnsstøtte nokon gong, opplyser Norad.

- Saka er kjenneteikna av at mange givarar er blitt lurte av fleire aktørar på mottakersida over lang tid, på fleire ulike måtar, seier leiar av Norads varslingsteam Svend Skjønsberg.

Fem norske givarorganisasjonar har samarbeidd om granskinga av organisasjonen Christian Sports Contact (CHRISC). Granskinga har halde på sidan hausten 2016 og har gått føre seg i tre land: Kenya, Tanzania og Uganda.

I tillegg er også idrettsturneringa East Africa Cup undersøkt. Gjennom granskinga har organisasjonane avdekt misleghald av nærmare 5 millionar kroner for perioden 2012 til 2016.

Til saman har dei fem organisasjonane no betalt tilbake 4,97 millionar kroner til Norad og statskassen. Digni (ein paraplyorganisasjon som 20 misjonsorganisasjonar og kyrkjesamfunn driv med støtte frå Norad) har gjennom Kristen Idrettskontakt (KRIK) betalt vel 2,5 millionar kroner og Norsk Folkehjelp har betalt nesten 1,7 millionar kroner. Strømmestiftelsen har måtta betale tilbake 626.000, medan Norges idrettsforbund og Atlas-alliansen har betalt resten.

Digni har avslutta all prosjektstøtte til KRIK og den internasjonale avleggjaren CHRISC. Digni vurderer rettsleg forfølginga av dei som er skyldige i misleghaldet, skriv Bistandsaktuelt.

(©NPK)