NRK sa unnskyld til Raja etter «neger»-utsegn

Under pressekonferansen om det reviderte nasjonalbudsjettet torsdag, brukte ein NRK-tilsett ordet «neger». Kanalen har unnskyldt seg overfor Abid Raja (V).

- Eg trur ikkje at intensjonane hans var vonde, men dette viser likevel at vi har mykje vaksenopplæring igjen å gjere i Noreg kva angår kva ulike ord betyr og kva for haldningar vi representerer, seier Raja til NTB.

Episoden han omtalar skjedde torsdag kveld rett før pressekonferansen i Oslo der semje om det reviderte nasjonalbudsjettet skulle presenterast. Den NRK-tilsette bad Raja, Henrik Asheim (H), Helge André Njåstad (Frp) og Kjell Ingolf Ropstad (KrF) om å stille seg annleis av lydmessige grunner, for så å legge til:

- Neger på lys bakgrunn, det er ikkje så bra.

Abid Raja reagerte umiddelbart på utsegna. Til NTB seier han at det er viktig å forstå at ordet «neger» er eit svært belasta ord for folk med bakgrunn frå Afrika.

Han er derfor fornøgd med at NRK har sagt unnskyld i etterkant av hendinga.

- Dei kontakta meg på eige initiativ, og eg er nøgd med at dei legg seg flate. Eg har ikkje tatt noka skade av dette, og ber ikkje noko nag. Eg forstår at han ikkje hadde vonde hensikter, understrekar Raja.

NTB kjenner ikkje til identiteten til den NRK-tilsette, men har bede om ein kommentar frå vedkommande overfor programredaktør i NRK Espen Olsen Langfeldt. Langfeldt seier at NRK ønskjer å ta hendinga via tenesteveg, og stadfestar at NRK har unnskyldt seg utan atterhald overfor Abid Raja.

- Det er generell semje om at slik ordbruk ikkje skal skje, og vi kjem til å følgje opp dette, seier Langfeldt til NTB.

(©NPK)

Kjell Ingolf Ropstad (KrF), Abid Q. Raja (V), Helge André Njåstad (Frp) og Henrik Asheim (H) presenterte revidert nasjonalbudsjett fredag. Foto: Vidar Ruud / NTB scanpix