Nytt barneombod blir presentert fredag

Blant dei 67 søkarane til den ettertrakta jobben er det 48 kvinner og 19 menn.

Ein av søkarane er den 47 år gamle tingrettsdommaren Inga Bejer Engh, som var aktor i 22. juli-saka.

Statsråd Anniken Hauglie (H) presenterer det nye barneombodet på ein pressekonferanse fredag.

På søkjarlista er også tidlegare generalsekretær i Norges idrettsforbund Inge Andersen (53). Andre søkjarar er det første mobbeombodet i landet, Bodil J. Houg (47), og utanriksminister Ine Eriksen Søreides mann Øystein Eriksen Søreide. Han var tidlegare byråd for helse og sosiale tenester i Oslo kommune, men har vore bydelsdirektør i Grorud sidan 2016.

Etter det NTB får opplyst frå regjeringskjelder var Eriksen Søreide ikkje blant dei tre kandidatane til jobben som i april vart intervjua av eit barnepanel.

Eriksen Søreide er gift med utanriksminister Ine Eriksen Søreide (H), som er nær venninne av barne- og likestillingsminister Linda Hofstad Helleland (H), og ho har derfor erklært seg inhabil. Arbeidsminister Anniken Hauglie (H) er settestatsråd i saka.

Barneombodet er både eit kontor og ein person. Dagens barneombod, Anne Lindboe, vart utnemnt til stillinga i 2012 av dåverande statsråd Inga Marte Thorkildsen (SV), og går av i år etter seks år i jobben.

Barneombodet er fagleg uavhengig, men administrativt underlagt Barne- og likestillingsdepartementet (BLD).

(©NPK)

Dagens barneombod Anne Lindboe er ferdig med sitt seks år lange åremål, og no har regjeringa funne hennar erstattar. Foto: Terje Bendiksby / NTB scanpix