Økonom avlyser eldrebølgja

Økonom Sindre Farstad viser til at delen sysselsette ikkje fell i framtida dersom det blir færre barn og friskare eldre.

Ideen om eldrebølgja stammar frå prognosar som viser at det i dag er 2,7 sysselsette i sving for å forsørgje kvar pensjonist, mens det berre vil vere 1,6 sysselsett som gjer same jobben i 2060, ifølgje Klassekampen. Det vil kunne gå ut over velferda.

I ein fersk artikkel i tidsskriftet Fagbladet samfunn & økonomi, hevdar derimot rådgjevar Sindre Farstad i Pensjonistforbundet at dette er ei kraftig overdriving. Han legg til grunn at den yrkesaktive alderen vil auke i takt med den forventa auken i levealder. Då vil det ikkje bli færre sysselsette samanlikna med resten av befolkninga framover.

- Det blir ofte skapt eit skremmebilde ved å vise at det vil vere langt fleire eldre i framtida. Men ein må kunne forvente at ein 65-åring i 2060 i gjennomsnitt er sprekare enn ein 65-åring er i dag, påpeikar Farstad.

Han får støtte frå professor Bjarne Jensen ved Høgskolen i Innlandet, som var redaktør for utgåva av fagbladet der artikkelen vart trykt.

Jensen kallar førestillinga om eldrebølgja er ein bløff.

- Eg meiner dette er ein konstruksjon laget for å skremme folk for å godta løysingar som dei elles ikkje ville gått med på, seier han om omgrepet «eldrebølgja».

(©NPK)

Friskare eldre og færre barn vil gjere at delen i arbeid ikkje kjem til å falle dramatisk i framtida likevel, ifølgje forskar. Foto: Jan Haas / NTB scanpix