Annonse

Ole Rolfsrud får språkpris

NRK-journalist og programleiar Ole Rolfsrud får Alf Helleviks mediemålpris 2018.

- Rolfsrud får prisen for å vere ein tydeleg og leiken nynorskbrukar gjennom mange år i NRK Sport og for å ha pløgd ny mark som laurdagsunderhaldar i «Alle mot 1" på NRK1, heiter det i ei pressemelding frå Samlaget.

Rolfsrud har saman med medprogramleiar og fysikar Selda Ekiz gleda TV-sjåarar i heile vinter på laurdagskveldane i det som har vore ein av NRKs storsatsingar denne TV-sesongen. Det er allereie planlagt ein ny sesong med det suksessrike programmet.

Rolfsrud, som opphavleg er frå Hareid i Møre og Romsdal, er tidlegare blitt tildelt språkprisen til kringkastingssjefen i 2015. Rolfsrud er programleiar i NRK sport.

Alf Helleviks mediemålpris skal gå til yngre faste nynorskbrukarar i radio og fjernsyn som legg vekt på å dyrke eit normalisert nynorsk talemål. Prisen er på 25.000 kroner.

Tidlegare vinnarar er blant andre Ingvild Bryn, Håkon Haugsbø, og Yasmin Syed.

(©NPK)

NRKs Ole Rolfsrud (t.v.) og sjakkmanager Kyrillos Zangalis (t.h) på scena under Idrettsgallaen i fjor.
Foto: Jon Olav Nesvold / NTB scanpix

Annonse
Annonse