Politiet bekymra over heimelaga handvåpen

- Dei er veldig like originale våpen. Med det blotte auge kan ein nesten ikkje sjå forskjell. Dei er enkle å skaffe, og dei er lette å gjere om på. Det er svært urovekkjande, seier politioverbetjent Gøran Dyvesveen til NRK.

Han jobbar ved kriminalteknisk avdeling hos Kripos i Oslo, som er det einaste våpenlaboratoriet i Noreg.

- Dette er våpen som opphavleg er laga berre for å gi eit lydsignal. Det blir meir og meir vanleg at desse blir bygde om, så ein kan fyre av skot med skarp ammunisjon, fortel han.

Politiet i Oslo ønsker at kjøp og sal av knallvåpen skal regulerast strengare.

- Konverterte knallvåpen er populære til «eingongsbruk» der ein skal skyte nokon og deretter kaste frå seg våpenet, fortel Anders Rasch-Olsen, seksjonsleiar for spesielle operasjonar ved Felles eining for etterforsking og etterretning.

Knallvåpen kan blant anna bestillast på nettet, og eigarskapet er vanskeleg å spore, sidan dei ikkje blir registrerte. Dei er også mykje billigare enn originale skytevåpen.

Rasch-Olsen seier eit omgjort våpen ikkje kan gjere like stor skade som eit ekte våpen, men dei er farlege på kortare avstandar.

Politiet i Oslo har beslaglagt rundt 50 knallvåpen dei siste tre åra, av dei er cirka halvparten bygde om til funksjonelle handvåpen. Hittil i år er det beslaglagt rundt fem slike våpen i Oslo.

(©NPK)

Kriminalteknikar Gøran Dyvesveen seier det er blitt vanlegare å byggje om knallpistolar slik at dei kan brukast med skarp ammunisjon. Foto: Heiko Junge / NTB scanpix