Putin gir globaliseringa skylda for skulemassakren på Krim

Torsdag steig talet på døde til 20 etter at ei jente døydde på sjukehus av skadane ho hadde fått.

- Dette er eit resultat av globaliseringa. På sosiale medium, på internett, ser vi at det er etablert eit heilt eige samfunn. Alt starta med dei tragiske hendingane på skular i USA, sa Putin då han talte på ein konferanse i Sotsji torsdag.

Kan ha fått hjelp frå andre

Russlands nasjonale etterforskingskomité har slått fast at det var Vladislav Rosljakov som stod bak massakren onsdag på yrkesskolen i Kertsj ved Svartehavet. 18-åringen tok deretter sitt eige liv.

Sergej Aksjonov, den øvste politiske leiaren på Krim-halvøya, understreka torsdag at Rosljakov var åleine om ugjerninga, men han ser ikkje vekk frå at 18-åringen kan ha fått hjelp frå andre til å planleggje angrepet.

Mindreårige offer

Ni av dei tjue som vart drepne, var mindreårige. Det yngste av offera var ein 15 år gammal gut, og det var òg fleire 16-åringar blant dei drepne.

43 andre vart såra under skulemassakren, mange av dei mindreårige.

Skulemassakren er den verste i sitt slag i russisk-kontrollerte område. Russland invaderte og annekterte Krim-halvøya frå Ukraina i 2014.

(©NPK)

Kvinner tenner lys til minne om offera for skulemassakren i Kertsj på Krim-halvøya. Foto: AP / NTB scanpix,

Russlands president Vladimir Putin gir globaliseringa skylda for skulemassakren på Krim-halvøya. Foto: AP / NTB scanpix