Putin trur på langsiktig økonomisk vekst i Russland

Under eit direktesendt TV-program torsdag sa den russiske presidenten at landet no har reist seg etter fleire år med resesjon.

Blant anna viste Putin til at BNP for augneblinken er 1,5 prosent høgare enn på same tid i fjor. Dette beskriv han som «moderat vekst», men Putin uttalte at han trur framtida ser endå lysare ut.

- Vi har no gått inn i ein trend som peikar mot berekraftig økonomisk vekst, sa Putin, og viste til minimal inflasjon og teikn på berekraftig inntektsvekst i russiske heimar som bevis på dette.

- Vekst på kort sikt er garantert. Eg har også tillit til at veksten vil fortsette på lang sikt, sa Putin vidare.

Kommentarane kom i samband med det årlege fjernsynsprogrammet «Direktelinje med Vladimir Putin», som presidenten ofte har nytta til å styrkje sitt image som ein garantist for Russlands stabilitet.

I programmet svarar Putin på spørsmål frå publikum i salen, frå innringjarar og spørsmål innsende via e-postar og tekstmeldingar.

Ofte går han grundig til verks og svarar svært utfyllande. Direktesendinga har derfor ein tendens til å vare i mange timar.

Vanlegvis er det flest spørsmål om innanrikspolitikk, men internasjonal politikk har også ofte blitt eit tema.

Under programmet i fjor tilbaud Putin politisk asyl til den sparka amerikanske FBI-direktøren James Comey.

(©NPK)

Russlands president Vladimir Putin smiler til kamera mens han tar imot spørsmål frå publikum og innringjarar under det årlege TV-programmet «Direktelinje med Vladimir Putin». Foto: AP / NTB scanpix.