Rykta svirrar om Kims besøk i Kina

Nyheitsbyrået Bloomberg siterte måndag kjelder som hevda at Kim har reist på sin første utanlandstur som Nord-Koreas leiar.

Samtidig melde japanske medium at eit nordkoreansk tog kom til Beijing med eit enormt sikkerheitsopplegg. Toget skulle likne det Kim Jong-uns far, Kim Jong-il, brukte på utanlandsreiser då han var Nord-Koreas leiar.

Nyheita er verken bekrefta eller avkrefta frå offisielt hald. Tysdag melder nyheitsbyrået AP at ein kolonne med bilar og sikkerheitsvakter kom til pensjonat Diaoyutai, der fleire nordkoreanske leiarar tidlegare har halde til. Bilde viser at kinesisk politi har stengt av vegen inn til pensjonatet.

Det er ikkje meldt om noko planlagt statsbesøk mellom Nord-Korea og Kina, men sistnemnde er den viktigaste støttespelaren det lukka regimet har.

Den siste månaden har det vore ei rad teikn til avspenning mellom Nord-Korea, USA og Sør-Korea. USAs president Donald Trump har sagt seg villig til å møte Kim, og sørkoreanske styresmakter har opplyst at Kim har vore villig til å diskutere atomnedrusting. Regjeringa i Japan meiner det er sanksjonar og internasjonalt press som no har gjort Nord-Korea villig til å forhandle.

(©NPK)

Kinesisk politi har stengt av vegen inn til pensjonatet Diaoyutai i Beijing der fleire tidlegare nordkoreanske leiarar har budd. Rykta svirrar dermed om at Kim Jong-un har tatt turen til Kina, sitt første utanlandsbesøk som nordkoreansk leiar. Foto: Mark Schiefelbein / AP / NTB scanpix