Sjøfartsdirektoratet ber Hurtigruten gjere greie for Svalbard-segltur

- Vi har, med bakgrunn i ei bekymringsmelding, vedteke å ta kontakt med reiarlaget i dag. Der kjem vi til å be om ei kort utgreiing for dei vurderingar som er gjort. Når vi har fått denne informasjonen frå reiarlaget, så vil vi ta ei vurdering av saka, skriv kommunikasjonsdirektør Dag Inge Aarhus i Sjøfartsdirektoratet i ein e-post til nettavisa Sysla torsdag.

Både Norsk Sjømannsforbund og Arbeidarpartiet har reagert på at Hurtigruten har flytta passasjerferja Spitsbergen over i det internasjonale skipsregisteret NIS, slik at dei ikkje treng å tilby norsk tariff for dei tilsette.

For å kunne vere lovleg registrert i NIS-registeret må den likevel gå innom to utanlandske hamnar før eller etter stoppa i Noreg. Spitsbergen skal gå innom seks norske hamnar før turen over til Bjørnøya og Svalbard. Deretter vender den tilbake til norskekysten. Spørsmålet er om hamnene på Svalbard kan reknast som utanlandske.

Også Nærings- og fiskeridepartementet seier til Sysla at dei vil vurdere forståing av regelverket.

Hurtigrutens kommunikasjonssjef Rune Thomas Ege seier dei vil svare på alt direktoratet lurer på.

(©NPK)

Hurtigruten har seglt til Svalbard sidan slutten av 1800-talet. Bildet er frå Nordre Norskøya. Arkivfoto: Marianne Løvland / NTB SCANPIX