Annonse

Skadd Williams trekkjer seg frå Roland-Garros

Berre timar før den oppsette storkampen mot Maria Sjarapova, måtte tennisstjerna Serena Williams trekkje seg frå Grand Slam-turneringa Roland-Garros.

Ei skuffa Williams måtte til slutt innsjå at ho ikkje kan spele vidare på grusen i Paris. Ho forklarte at ho har pådrege seg ein muskelskade i brystet, og at ho ikkje kan serve.

Den hardtslåande amerikanaren vart mor i fjor haust og har ikkje spelt ei Grand Slam-turnering sidan Australian Open i 2017.

I comebacket på Roland-Garros har ho først og fremst fått merksemd for å spele i ein heildekkjande, svart drakt, men ho har også spelt godt nok til å ta seg vidare til 4. runde.

Der var det duka for stormøte med Sjarapova, som kritiserte Williams i ei bok ho gav ut nyleg. Williams har avfeia referansane til henne i boka som sludder. Og noko nytt stjernemøte mellom dei blir det altså ikkje på ei stund.

Williams har vunne Roland-Garros tre gonger, seinast i 2015. Ho har i alt 23 Grand Slam-titlar i single.

(©NPK)

Serena Williams må gi seg i Roland-Garros på grunn av ein skade. Foto: Christophe Ena / AP / NTB scanpix

Annonse