Sørkoreanske journalistar får reise til Nord-Korea likevel

Ei lita gruppe utanlandske journalistar kom til Nord-Korea tysdag. Dei sørkoreanske journalistane var også inviterte, men hadde ikkje fått stadfesting frå Pyongyang før avreise. Onsdag fekk dei likevel grønt lys av gjenforeiningsdepartementet.

- Styresmaktene vil sette i gang nødvendige tiltak for journalistane, som å godkjenne innreise til Nord-Korea og tilby transport, heitte det frå departementet.

Dei andre journalistane som får høve til å få med seg øydelegginga av testanlegget i Punggye-ri, kjem frå USA, Russland, Kina og Storbritannia. Dette er venta å skje ein gong mellom onsdag og fredag, avhengig av vêret. Sjølve anlegget ligg såpass aude at det vil ta 20 timar med tog og buss frå Pyongyang for å komme dit.

Kinesiske geologar hevda tidlegare i år at testanlegget alt er delvis øydelagt, noko som skjedde etter ei atomprøvesprenging i september i fjor.

Satellittbilde av anlegget viser ifølgje vestlege ekspertar at arbeidet med å avvikle anlegget begynte i midten av mai.

Nord-Korea har gjennomført seks atomprøvesprengingar i Punggye-ri. Den siste var så kraftig at den utløyste eit jordskjelv med ein styrke på 6,3.

(©NPK)

Ei gruppe utanlandske journalistar er no på plass i Nord-Korea for å dekke øydelegginga av eit anlegg for atomprøvesprengingar i Punggye-ri. Dette satellittbildet er frå mars i år. Foto: Airbus Defense and Space / 38 North / AP NTB scanpix