Spania klar for fotball-VM for kvinner

Spania tok torsdag sin sjette siger av like mange moglege i kvalifiseringa med 2-0 over gruppejumbo Israel. Då var Finland einaste lag med teoretisk moglegheit til å ta frå Spania gruppesigeren.

Det kravde derimot at finnane måtte vinne sine fire siste kampar, og fredag vart det 0-2-tap heime mot Austerrike. Eit tidleg sjølvmål av Emma Koivisto gjorde det vanskeleg for heimelaget, og Katharina Schiechtl fastsette resultatet i 2. omgang.

Dermed er Spania klar som den første av sju europeiske gruppevinnarar som alle får VM-billett. Vertslandet Frankrike er automatisk kvalifisert.

Den niande og siste europeiske VM-deltakaren vert kåra i omspel mellom dei fire beste toarane.

(©NPK)

Spania, her ved Alexia Putellas, vart første europeiske lag som vann si gruppe i kvalifiseringa til fotball-VM for kvinner. Foto: Terje Bendiksby / NTB scanpix