Annonse

Streng koronaregel blir fjerna før Tour de France

Tour de France-arrangøren har fjerna regelen som gjer at lag kan bli kasta ut av rittet dersom minst to ryttarar leverer positive koronatestar innan sju dagar.

Det internasjonale sykkelforbundet (UCI) publiserte ein oppdatert versjon av koronareglane tysdag. Det har vore svært mykje smitte i diverse lag før det prestisjetunge rittet, og UCI har teke valet om å lempe på reglane slik at flest mogleg skal få delta.

Feltet skal likevel testast tett under rittet, som skal starte med at alle ryttarar og støtteapparat skal levere ein negativ hurtigtest to dagar før løpet startar. Det vil seie onsdag. Ein slik test skal også takast under kviledagane.

Er hurtigtesten positiv, skal han deretter bli stadfesta med ein PCR-test. Det kjem ikkje fram i reglane kva som skjer med den koronapositive ryttaren og om lag kan sende inn reservar.

Tidlegare tysdag opplyste Quick-Step om at Tim Declercq testa positivt på korona ved tilkomst til København.

Tour de France startar 1. juli med ein individuell tempoetappe i København. Deretter skal det syklast to etappar til i Danmark før sykkeleliten flyttar seg til Frankrike.

(©NPK)

Tour de France-arrangøren har fjerna regelen som gjer at lag kan bli kasta ut av rittet dersom minst to rytterar avgir positive koronatestar innan sju dagar. Illustrasjonsfoto: Stian Lysberg Solum / NTB

Annonse