SV meiner Frps bustadpolitikk sviktar dei unge

Medan aldersgruppene mellom 30 og 59 år viser ein stigande framtidsoptimisme, er det eit sterkt fall hos dei under 30 år, viser ei ny undersøking frå Finans Norge. Funnet sjåast i samanheng med rapporterte utfordringar unge opplever med å kome inn i bustadmarknaden.

Utviklinga har skjedd på finansminister Siv Jensens (Frp) vakt, poengterer SVs finanspolitiske talsperson Kari Elisabeth Kaski. Ho meiner Frps «usosiale bustadpolitikk» har ført til auka usikkerheit og ei tid prega av mellombelse for dei unge.

Fryktar for dagens unge

Blant tiltaka Kaski kritiserer Frp for, er endringane i arbeidsmiljølova som aukar bedrifters moglegheiter til å tilsetje mellombels, og kutt i skattane til dei på inntektstoppen utan at det har gitt fleire arbeidsplassar for dei unge.

- Vi er i ferd med å få ein generasjon unge som har mista mykje av den fridomen som tidlegare generasjonar jobba fram. Vi ser at barnefamiliar har dårlegare inntektsutvikling, det er flest unge i mellombelse stillingar og unge har svært høg gjeld og problem med å kome inn i bustadmarknaden, seier ho til NTB.

SV ynskjer fleire faste stillingar for dei unge, eit meir omfordelande skattesystem og ein ungdomsgaranti for å få unge inn på arbeidsmarknaden. I tillegg vil partiet heve barnetrygda, som har vore lik sidan 1996.

Frp slår tilbake

- At SV kritiserer Frp for bustadpolitikken, fell på si eiga urimelegheit, seier finanspolitisk talsperson Helge André Njåstad i Frp til NTB.

Tysdag kunngjorde Siv Jensen at ho vidarefører bustadlånsforskrifta som opnar for at bankane kan ta med dokumenterte og stabile skattefrie inntekter som barnetrygd i rekninga av gjeld i forhold til inntekt. Njåstad meiner vidareføringa viser at Frp har ein sosial bustadpolitikk.

- Vi ynskjer fleire bustader og meiner det er viktig å føre ein ja-politikk på dette feltet, seier han til NTB.

Njåstad avviser at det er Frps finansministerpost som skal ha skulda for den aukande pessimismen blant dei unge. Han meiner det er lokalpolitikken det står på.

- Vi har Frp-arar på kommunenivå som har gått i bresjen for fleire bustader, men det er på kommunenivå det stoppar opp. Det er også difor det komande kommunevalet er viktig. Dei som ynskjer eit ja-parti på bustadfronten, bør stemme Frp, seier Njåstad.

Fredag held Frp sin oppsummerande pressekonferanse for sommaren. SVs tilsvarande pressekonferanse går av stabelen måndag 25. juni.

(©NPK)

Kari Elisabeth Kaski, finanspolitisk talskvinne i SV, refser Frps bustadpolitikk.
Foto: Ole Berg-Rusten / NTB scanpix