Trump ventar på brev frå Kim

Trump avlyste 24. mai eit planlagt toppmøte med Kim, og langa ut mot den nordkoreanske leiaren i eit brev som blei offentleggjort av amerikanske medium.

I det personlege brevet skulda han Kim for å ha vist «kraftig sinne» og «open fiendskap» og at det derfor ville vere «upassande» å møte han.

Få timar seinare ombestemte Trump seg tilsynelatande og antyda at det planlagte toppmøtet i Singapore 12. juni likevel ville kunne finne stad.

Uforståande

Nord-Korea kommenterte ikkje direkte innhaldet i brevet frå Trump, men stilte seg uforståande til den det som tilsynelatande var ei avlysing av toppmøtet frå den amerikanske presidenten.

- Ytst beklageleg, sa viseutanriksminister i landet Kim Kye-gwan, som understreka at den nordkoreanske leiaren når som helst er villig til å sette seg ned ansikt til ansikt med Trump.

Den høgre handa til Kim, den tidlegare etterretningssjefen og generalen Kim Yong-chol, kom onsdag New York, der han har hatt samtaler med utanriksminister Mike Pompeo.

Brev i bagasjen

Med seg i bagasjen hadde han også eit personleg brev frå Kim til Trump, som han fredag tok med seg til Washington for å overlevere til den amerikanske presidenten.

Pompeo opplyste torsdag at samtalene med den nordkoreanske utsendinga hadde vore konstruktive og at det var gjort reell framgang i arbeidet med å få i stand eit toppmøte. Han hylla også Kim Jong-un som «ein leiartype som kan ta dristige avgjersler».

Trump kommenterte også samtalene mellom Pompeo og Kim Yong-chol og hevda at dei gjekk svært bra. Han sa også at han gleda seg til å lese brevet frå den nordkoreanske leiaren.

- Eg ser fram til å sjå kva som står i brevet, sa han torsdag.

(©NPK)

Leiar Kim Jong-un i Nord-Korea har skrive brev til sin amerikanske motpart Donald Trump og sendt sin fortrudde medarbeidar Kim Yong Chol (bildet) til Washington for å overlevere det. Foto: AP / NTB scanpix