Zuckerberg skal møta europeiske parlamentarikarar

Møtet kan skje så tidleg som neste veke, skriv president i EU-parlamentet Antonio Tajani i ein uttale på Twitter.

Zuckerberg fekk i mars førespurnad frå Tajani om å møta opp i EU-parlamentet.

- Borgarane våre fortener ei fullstendig og detaljert forklaring. Eg ønskjer avgjerda til Mark Zuckerberg om å stilla opp i eigen person framfor representantane for 500 millionar europearar velkommen. Det er eit steg i rett retning for å oppretta tillit, skriv Tajani.

Framfor parlamentarikarane må Zuckerberg forklara korleis analyseselskapet Cambridge Analytica, som hjelpte Donald Trump i valkampen, kunne stela personopplysningar om 50 millionar Facebook-brukarar. Zuckerberg må også klargjera at persondata ikkje blir brukt for å manipulera demokratiet.

(©NPK)

Facebook-sjef Mark Zuckerberg har takka ja til ein invitasjon frå EU-parlamentet om å forklara korleis informasjon om millionar av brukarar kunne hamna på avvegar. Foto: AP / NTB scanpix